Frí

Það góða við það að vinna eins og brjálæðingur er að fyrir rest kemur frí.
Endalaust þakklæti fyrir þetta frí, þó það sé ekki nema í tvo daga, eins og núna, í mínu tilviki. Ég bauð fólki góða helgi þegar ég yfirgaf vinnustað minn áðan. Það skildu það samt allir. Starfsmaður er illa áttaður á stund sökum brenglaðs vinnutíma.
Ætla að verja fríinu mínu í hvíld og eitthvað skemmtilegt. T.d. á morgun er ég að fara að sörfa. Nei ekki á netinu. Í sjó. Alvöru. Eins og í Point break, sem var by the way uppáhalds myndin mín í einn mánuð þegar ég var unglingur. Fór á hana ca fimm sinnum í bíó, eða alveg þangað til þeir byrjuðu að sýna Bodyguard. Keanu Reeves verður samt ekki með í för. Hann afþakkaði boðið. Enda enn fúll yfir neikvæðum skrifum mínum, að hans mati, um hann hér á blogginu. Ég fer því með Aðalheiði. Við ætlum að leita uppi gott brim. Fara svo í brimgallann og taka brimbrettið út að sjó. Þá tökum við brimbrettið og syndum með það undir hægri handlegg. Alveg eins og Keanu gerir. Nei bíddu, það er ekki svoleiðis, við höldum á brimbrettinu undir hægri handlegg að sjónum. Svo leggjumst við á það og syndum skriðsund (með höndunum) ofan á brimbrettinu langt út á haf. Svo stöndum við upp, á brimbrettinu og í brimgallanum, og sörfum að landi. Að sjálfsögðu með báðar hendur úti til að halda jafnvægi. Svo kemur geðveikt stór alda og við náum samt að halda jafnvægi og gefum hvor annarri high-five ofan á öldunni. Svo björgum við öðru brimbrettafólki úr háska. Svo kemur allt brimbrettafólkið saman í sólinni, allir mjög brúnir og með hálsmen. Svo kveikjum við varðeld um kvöldið (ég þekki sko nokkrar löggur, fæ undanþágu, má kveikja eld á opnu svæði). Keyrum svo heim eftir góðan dag á jeppanum okkar sem er topplaus og örlítið gamall og ryðgaður, með brimbrettin í skottinu.

Einmitt. Þannig er það allavega í Point break. Ég hinsvegar hef aldrei á ævinni stigið á brimbretti. Kom mér í þessa vitleysu sjálf, sem framundan er.

Aðalheiður: "Hey Hulda, ertu ekki í fríi á mánudag, viltu gera eitthvað?".
Hulda: "Já svo sannarlega, til er ég".
Aðalheiður: "Eigum við að sörfa?".
Hulda: "Ehhh, sörfa á netinu þá? Saman? Er það ekki svolítið hæpið?".
Aðalheiður: "Nei(hlær dátt) finna góðar öldur maður".
Hulda: "Ehhh..ha..ehhh".
Aðalheiður: "Já það er gaman, ég redda þér galla og bretti, gerum þetta".
Hulda: "Uhh.. tja .. uhh.. ég þarf aðeins að spá í..".
Aðalheiður: "Svalt, ég sæki þig þá kl.12. Bæ bæ".

Góðan daginn góðir hálsar. Á morgun fer ég, Hulda Gísladóttir, í fyrsta sinn á brimbretti. Guð sé oss nærri.